Greta Naraçi, shefe e pediatrisë në Spitalin e Shkodrës, ka ndarë më shumë detaje mbi tragjedinë ku një 3-vjeçar humbi jetën dhe motra e tij 7-vjeçare është në gjendje të rëndë shëndetësore..
Sipas Naraçit, kur fëmija i vogël 3-vjeçar ka mbërritur në spital, ka qenë në gjendje të shokut kardiak, me një insuficiencë kardiake tepër të rëndë që ka bërë të pamundur ndihmën e duhur.
“Ishte një situatë shumë e vështirë. U munduam ta ulim në reanimacion, por koha ishte shumë e shkurtër dhe nuk na dha mundësi për të vendosur një diagnozë të saktë. Ishte shumë e vështirë edhe të merrnim gjak nga fëmija, pasi gjendja ishte kaq e rëndë” tha Naraçi, duke shpjeguar se ka qenë tepër vonë për të ndërhyrë në kohë.
Motra 7-vjeçare është shtruar në repartin intensiv të QSUT në Tiranë, ku mjekët po ndjekin me kujdes gjendjen e saj, por nuk ka ende konfirmim për shkakun e helmit apo virozës./ BalkanWeb